Entre os nomes máis destacados desta programación figuran a banda ‘indie’ Los Planetas, a prestixiosa compañía teatral La Fura dels Baus, o espectacular musical ‘The Hole Zero’ ou os históricos humoristas Les Luthiers.
A parte musical traerá neste semestre grandes nomes do pop español. Ademais dos aclamados Los Planetas, que chegarán a Vigo o 24 de novembro dentro da histórica xira ‘XX aniversario’, tamén pasará polo Mar de Vigo Coque Malla o 26 de outubro, coa súa xira ‘Coque Malla y el Cuarteto irrepetible’ e a cantautora Rozalén, que está anunciada para o 6 de Outubro presentando o seu disco ‘Cuando el río suena’, que xa leva o 80% do aforo vendido e vai camiño de esgotar todas as entradas semanas antes da cita.
A programación de concertos aínda se completará con novos artistas que se anunciarán nas vindeiras semanas e tamén no último trimestre do ano co ciclo ‘M Vigo’, que prestará especial atención ás mulleres, e polo que pasarán artistas moi coñecidas en xéneros que van desde o pop ata o ‘indie’ pasando polo flamenco.
Os grandes musicais serán outro dos pratos fortes da programación, encabezados polo excepcional ‘The Hole Zero’, a nova produción da saga ‘The Hole’ que se representa por primeira vez en Galicia cun novo show diferente que mestura música, circo e cabaret e incluso presenta a novidade de ter a parte dianteira do auditorio habilitada nun formato cabaret con mesas e sillas.
Este musical promete ser un dos grandes acontecementos de inicio de outono e fará sete funcións no Mar de Vigo, do 27 ao 30 de setembro. Outros dos musicais será ‘Shrek’, unha aposta familiar cun agardado espectáculo producido en Galicia, e que terá lugar o 27 de outubro.
Ademais, un gran nome propio da historia do teatro español, La Fura dels Baus, será outro dos pratos fortes da programación do Mar de Vigo nos vindeiros meses. A xira do seu espectáculo ‘Carmina Burana’, despois de pasar por tres continentes e ser presenciada por 150.00 espectadores, só fará unha parada en Galicia para a que elixiron a cidade de Vigo. Este deslumbrante espectáculo, dirixido por Carlos Padrissa e con música de Carl Orff, porá en escena máis de 30 artistas e representarase en tres funcións no Mar de Vigo, do 30 de novembro ao 2 de decembro.
Humor
Outro incombustible grupo de humoristas recalará no Mar de Vigo no mes de novembro. Trátase dos arxentinos Les Luthiers, que regresan a Vigo co seu espectáculo ‘Viejos Hazmerreíres’, e tamén estarán sobre as táboas do auditorio en tres función consecutivas, do 16 ao 18 de novembro, para as que xa teñen gran parte do aforo vendido.
Dentro da liña de programación dedicada ao humor, os monólogos seguen sendo unha aposta no Mar e Vigo, e o 3 de novembro chega o espectáculo ‘Monólogos Interruptus’, guiado por un excepcional trío de humoristas como son Dani Rovira, JJ Vaquero e Iñaki Urrutia.
Espectáculos familiares
Como vén sendo habitual nos últimos meses, o Mar de Vigo mantén unha liña de programación pensada nos máis pequenos e ó público familiar. Nesta ocasión, o 7 de outubro chega ‘Caperucita Roja’, no singular formato de ópera teatral didáctica para toda a familia, e o 4 de novembro un clásico como ‘Peter Pan’.
Outro espectáculo familiar inédito terá lugar no Mar de Vigo o 28 de decembro para rematar o ano, como é a sorprendente ‘Orquesta de instrumentos reciclados de Cateura’, formada por rapaces e mozos de entre 11 e 25 anos, procedentes dun barrio marxinal de Asunción (Paraguai), que fabrican os seus instrumentos con material reciclado procedente dun vertedoiro. Vigo será unha das dúas únicas cidades españolas onde actuará esta orquestra, ademais do Teatro Real de Madrid. Será a primeira vez que esta formación actúe en Galicia despois de pasar por cidades como Nova York, Roma ou Tokio, grazas a un acordo de colaboración entre o Concello de Vigo e Ecoembes.
Finalmente, a música clásica tamén terá unha presenza importante coa temporada de concertos da Orquesta Sinfónica de Galicia. O Mar de Vigo acollerá oito actuacións da OSG, que abrirá a temporada en Vigo o 11 de outubro e se prolongará ata o mes de xuño. Para todas estas actuacións e todos os espectáculos poderá obterse información e adquirir as entradas na web do auditorio www.auditoriomardevigo.com .
