Esta campaña ten como eixos centrais un cartel e un vídeo con imaxes de Luz Beloso e texto de Isabel Blanco. Na imaxe fixa aparecen un grupo de nenas e un neno que son os que se poñen por riba e agretan as verbas “estereotipos de xénero”, para amosar a mensaxe final de “igualdade, diversidade e non violencia”.
Mentres, no vídeo os e as protagonistas cobran voz e movemento para romper o muro dos prexuízos, animando así a “cambiar as regras do xogo”, en palabras da presidenta da Deputación, Carmela Silva, “porque nós, así, non xogamos”. As voces son da xornalista Belén Porteiro e de dous nenos e dous nenas, “algún deles moi pequeno, e é marabilloso escoitalos”.
Ademais destes vinilos colocados nos autobuses de Vigo, a campaña estará presente en mobiliario urbano exterior de toda a provincia de Pontevedra. Na presentación dos soportes gráficos que xa se poden ver ao longo da cidade nas liñas H e C3, Silva estivo acompañada da deputada Ana Laura Iglesias, da directora de marketing de Vitrasa, Dori Gómez, de dúas condutoras do servizo e do alcalde de Vigo, Abel Caballero.
“A igualdade é o novo tempo de entender a sociedade e seguiremos dando pasos nesta dirección”, valorou o rexedor vigués. A mandataria provincial salientou a importancia de “mercar e agasallar con sentido e con igualdade” durante este Nadal.