A Deputación de Pontevedra foi informada este luns polo Servizo de Prevención de Riscos Laborais da existencia de tres positivos por Covid-19 entre o seu persoal laboral. Tras coñecer a situación, a institución activou “de xeito inmediato” todos os protocolos correspondentes á normativa sanitaria.
Segundo informa a administración provincial, no primeiro dos casos a persoa que deu positivo nas probas atopábase en período de vacacións e “non tivo ningún contacto co resto do persoal da Deputación de Pontevedra”. Nos outros dous casos, “trátase de persoas que realizan as súas funcións en servizos externos”.
Os responsables de Prevención informaron igualmente do seguimento doutro posible contaxio, xurdido a raíz da infección dun familiar da persoa traballadora. Este potencial positivo está en estudo e á espera das probas preceptivas.
