A día de hoxe hai inscritas 22 comparsas, pero o prazo de inscrición segue aberto ata este venres. Para elo, terán prioridade as comparsas mosenses e tamén se puntuará positivamente o maior número de integrantes. Das rexistradas ata o de agora, 10 son de Mos, 5 de Vigo, 2 de O Porriño, 2 de Gondomar, 1 de Salvaterra, 1 de Tomiño e 1 de Nigrán. Entre elas hai 19 comparsas de adultos e 3 infantís (as infantís son unha de Mos, outra do Porriño e outra de Vigo).
O comezo do desfile terá lugar diante do concesionario da Renault en dirección ás inmediacións da Discoteca Queen. Ao remate do mesmo haberá un DJ infantil que amenizará musicalmente a entrega de premios.
Os premios que inclúe o Concurso de Comparsas do Desfile de Entroido do Concello de Mos son: Premio único á mellor comparsa infantil, Premio único á mellor comparsa de adultos, Mención especial á mellor carroza, Mención especial ao mellor vestiario, e Mención especial animación.
Actividades varias
A programación para o Entroido 2018 tamén inclúe unha Festa Infantil con concerto de Peter Punk e desfile de disfraces, que se celebrará o día 12 de febreiro ás 17.00 horas no Multiusos das Pozas.
Os adultos tamén poderán celebrar por todo o alto o evento cunha Festa de Disfraces que inclúe cea e sesión DJ e que terá lugar o 17 de febreiro a partir das 22.00 horas tamén no Multiusos das Pozas. Esta actividade, dirixida a maiores de 18 anos, ten un prezo de participación por persoa de 20 euros e require de inscrición previa nas oficinas da OMIX sitas no edificio Multiusos.
Os cativos poderán tamén gozar, aprender e divertirse no habitual Campamento Infantil de Entroido que acolle a Ludoteca de San Rafael (Pereiras). Esta iniciativa, fundamental para a conciliación da vida familiar e laboral dos pais e nais de alumnos que teñen que traballar durante as vacacións dos seus fillos, vai dirixida a nenos e nenas de 3 a 12 anos de idade.
As datas de celebración deste campamento serán os días 12, 13 e 14 de febreiro en horario matinal de 09.00 horas a 14.30 horas. Os interesados en participar deberán inscribirse nas oficinas da OMIX no Multiusos, chamando ao teléfono 986 33 94 04, ou presenzalmente na propia Ludoteca de San Rafael.
En ambas Ludotecas Municipais, a de San Rafael en Pereiras e a de Louredo, e tamén perseguindo o obxectivo da conciliación da vida familiar e laboral, impartirase o curso de cociña ‘Cociñamos no Entroido na Ludoteca’ dirixido a nenos e adultos. Impartirase o 10 de febreiro de 10.00 horas a 13.00 horas. As inscricións deberán ser formalizadas nas oficinas da OMIX no Multiusos, chamando ao teléfono 986 33 94 04, ou presencialmente na propia Ludoteca de San Rafael.
