“As vidras, /ledas mozas churrusqueiras/ maquilladas de sulfato,/sorrinlle ao vento coquetas”. Estes versos do poemario ‘Bebedeira” de Florencio Delgado Gurriarán, foron a escolla do alcalde de Vigo para concluír o seu discurso e dar comezo ao acto lectura de fragmentos da obra do autor homenaxeado este ano no Día das Letras Galegas.
Tras enviar unha “fondísima aperta” para Domingo Villar, que se atopa en estado grave tras sufrir un ictus o luns, Caballero comezou a súa alocución sobre o homenaxeado, “un galego ilustre cunha poesía magnífica e cun compromiso activo”. Así describiu Abel Caballero a Florencio Delgado Gurriarán, durante o acto oficial celebrado na Casa Galega da Cultura de Vigo. O alcalde cualificou a Florencio Delgado Gurriarán como un home cunha traxectoria excepcional, “non suficientemente coñecido e seguramente este recoñecemento do Día das Letras Galegas a Delgado Gurriarán serve para recuperar a súa traxectoria e a súa poesía pero tamén a súa dinámica política”, indicou.
O rexedor destacou a mestura “tan importante de desexo político, querenza a Galicia e literatura” como “un trípode de valor inestimable”. Durante o seu discurso, o alcalde subliñou que Gurriarán “dedicou a súa vida a unha forma especial de trazar a poesía, ligada ao territorio, á terra e aos costumes pero ao mesmo tempo foi quen de comprometerse activamente, coa súa participación nas Irmandades da Fala, e sobre todo no Partido Galeguista, facendo do galeguismo un valor transversal, onde el foi trazando as súas sendas, que hoxe en día seguimos e seguen tantas xentes, tantas institucións”.
Caballero tamén trazou diferentes paralelismos entre o homenaxeado este ano e o arquitecto Gómez Román, “que algúns queren tildar de fascista”, posto que compartía con Delgado Gurriarán a súa querenza a Galicia e a súa presenza no Partido Galeguista. “Estamos en tempos nos que todo se pode desvirtuar e estamos asistindo a ataques a Gómez Román, seguramente o máis importante arquitecto que houbo nunca en Galicia, pero imos defendelo”, dixo.
“Gurriarán foi leal á República, como Gómez Román. Un desde a súa estancia en Barcelona e Gómez Román como concelleiro de Unidade Popular neste concello, formando parte do equipo de goberno de Martínez Garrido, fusilado en 1936”, quixo salientar Caballero.
De Blas: «O Día das Letras Galegas naceu en Vigo«
Previamente, o xornalista Ceferino de Blas, cronista oficial da cidade, facía lectura do pregón do Día das Letras Galegas. Cun recordo inicial para o escritor Domingo Villar, hospitalizado este luns, De Blas quixo salientar que “O Día das Letras Galegas naceu en Vigo. É a cidade onde se publicou ‘Cantares Gallegos’ e onde ao cumprise o seu centenario se propuxo que simbolizase a exaltación da lingua galega”, indicou, recordando que o autor da iniciativa foi Francisco Fernández del Riego, quen xustifica a data do 17 de maio porque é o día do aniversario do marido de Rosalía de Castro, Manuel Murguía, a quen a autora dedica ‘Cantares Gallegos’.
Durante a lectura do seu bando, Ceferino de Blas explicou que Gurriarán militou no Partido Galeguista, no que accedeu á executiva e chegou a ser secretario de Propaganda. “A distancia do exilio non o desvinculou do compromiso coa súa terra nativa, a lingua, a súa cultura e patrimonio. Ao contrario, tivo sempre presente a Galicia, e tratou de contribuír coa súa actividade cultural e intelectual”, indicou.
