O marco escollido para este evento non podía ser outro que a taberna de Elixio, espazo recorrente nas novelas de Villar e un dos lugares predilectos do seu protagonista: o inspector Leo Caldas.
A taberna de Elixio, foco de creación artística da noite viguesa do casco vello, aproveitaba así para anunciar a súa próxima reapertura no mes de marzo, celebrando tamén o regreso dun dos novelistas que máis sona lle ten dado dentro e fóra das nosas fronteiras á cidade olívica. Así, a editora de Siruela, Ofelia Grande, non dubidaba en afirmar que Villar puxera Vigo no mapa e fixera viaxar ata os enclaves da súa ría a milleiros de lectoras e lectores en todo o mundo.