O acto contará coa presenza da autora; o director da Editorial Elvira, Xabier Romero; e coas profesoras da Facultade de Filoloxía e Tradución de Vigo: Ana Luna Alonso, María Jesús Fariña Busto e Beatriz Suárez Briones. A presentación estará amenizada polo guitarrista Pako Represas e o percusionista baiano Dam Santana (membros de Kalapordiós).
Clara do Roxo, nada en Caracas, é filla de emigrantes. Licenciada en Xeografía e Máster en Escritura e Narración Creativa. A partir do ano 2008 comeza a acadar premios literarios: 2º premio do Certame de relatos Mulleres Progresistas (2008), 2º premio do Certame de relatos Cultura Quente de Caldas (2009), 1º premio do Certame de relatos A Cividade (2009 e 2010), 1º premio do Certame de relatos Vila de Mugardos (2010), Accésit do Certame Modesto Figueiredo (2010, 2013), 1º premio do Certame de relatos Manuel Murguía (2011), 1º premio do Certame de relatos De Catro a Catro (2011), Accésit do Manuel Oreste (2011), 1º premio (texto) Certame de Curtas Concello sobre violencia de xénero (2011), 1º premio do Certame «Dillo a quen maltrata» de Lalín (2014), 1º premio do Certame de microrrelatos Mulleres Progresistas (2015), e finalista do Premio de novela Torrente Ballester en lingua galega (2018).
Obra individual: A princesiña que conducía unha locomotora (Galaxia 2012), A mamá que perdeu as cóxegas (Galaxia 2015), Sombras no Ensanche (Ed. Elvira 2016), Actrices secundarias (Ed. Elvira), obra finalista do premio Torrente Ballester 2018 en lingua galega. É directora e profesora da Escola de Escrita Creativa en lingua galega Aliteraraclara dende 2013 e profesora de relato en El Portal del Escritor dende 2017, tarefas que compaxina co seu traballo no departamento de administración da Conservación de Estradas do sur de Pontevedra.
Sinopse da obra: Esta é a historia de un home e unha muller, coma tantos miles, que emigraron a América e formaron unha familia; na súa cabeza sempre estivo «volver», pero non sabían que o regreso sería máis duro que a marcha. É unha historia, como moitas das que se formaron alén mar, con segredos inconfesables, secasí… «cada familia asume as súas ilexitimidades e inmoralidades como pode». Pero, sobre todo, é a historia de catro mulleres que asumiron cada unha dun xeito diferente o seu papel secundario, un chanzo ou varios debaixo do papel principal reservado só aos homes.