Un dos epicentros dos lumes de outono de 2017 tivo lugar a carón do CEIP Sobreira-Valadares e do IES de Valadares. Por tal motivo, diante destes centros tivo lugar a primeira parte do acto, cunha plantación simbólica por parte de escolares de todas as idades.
Como símbolo de lembranza desta plantación inaugurouse no monte da Sobreira un monolito representativo por parte das autoridades presentes.
Posteriormente, o grupo de escolares trasladouse ata Monte dos Pozos onde tivo lugar o xesto de abrazar ao monte queimado e ler o manifesto do acto, para berrar ao final o lema da campaña: “Eu son cortalumes”.Por parte da Comunidade de Montes de Valadares fíxose ademais unha solta de pombas como símbolo de que os montes volven a recobrar vida.
Finalmente, despois da merenda tivo lugar o festival onde, da man do ‘home orchestra’, cantáronse cancións e realizáronse bailes, podendo coñecer a historia do monte dos Pozos.
Os centros educativos que participaron foron: CEIP Sobreira-Valadares, CEIP J. Alonso-Matamá, CEIP A Paz-Tintureira, CEIP Castelao-Navia, CEIP Igrexa Candeán, CEIP Eduardo Pondal, CEIP O Pombal, CEIP Escultor Acuña e o IES de Valadares.