As residentes de enfermaría de Saúde Mental Nuria Feijoo e Jessica Pena, xunto a Luís Pallarés, auxiliar psiquiátrico da Unidade de Coidados Especiais do servizo de Rehabilitación Psiquiátrica do Hospital Nicolás Peña, foron as encargadas de presentar o póster que resultou gañador como a mellor comunicación deste tipo no transcurso da xornada.
Baixo o título “Aprende xogando: clean your hands”, no póster explicáronse as características do xogo, tipo “trivial”, que xa se utiliza con pacientes no hospital vigués e que sorprendeu aos asistentes ao evento pola súa imaxinación. De feito foi un dos elementos destacados na recente campaña institucional na área sanitaria de Vigo con motivo do Día Internacional do Lavado de Mans.
Importante presenza de Vigo
A área sanitaria de Vigo tivo un especial protagonismo no transcurso da xornada de enfermaría. Nos debates a representación estivo a cargo de Nuria Carrera, membro da Asociación Española de Enfermaría de Saúde Mental, que tamén é profesora da Escola de Enfermería do Meixoeiro e especialista en saúde mental da Unidade de Psicoxeriatría do Hospital Nicolás Peña.
Participou na mesa redonda “Coidando máis aló do hospital” na que expuxo o relatorio titulado “Experiencias do traballo enfermeiro nunha unidade de psicoxeriatría”, un relato descritivo da traxectoria da consulta de enfermaría que desenvolve desde o ano 2016.
Por outra banda, a coordinación do comité organizador da xornada estivo a cargo de Laura Jardón, enfermeira especialista de saúde mental da Unidade de Hospitalización de Psiquiatría do Hospital Álvaro Cunqueiro e delegada en Galicia e vogal da Asociación Española.