No evento, presentado polo humorista galego Rober Bodegas, foron galardoadas dous das cinco actuacións da área metropolitana de Vigo que estaban nominadas. Trátase da reforma da igrexa de Tirán, en Moaña, e da construción da escola infantil da Veigadaña, en Mos.
O templo do Morrazo competía na categoría de Rehabilitación e foi proxectado polo arquitecto Antonio Pernas Varela. O xurado valorou que a intervención “trata á igrexa cun respecto e delicadeza exemplares, eludindo o protagonismo do novo e integrando os materiais e linguaxes contemporáneos con sobriedade e acerto”. “Trátase dunha posta en valor exemplar do edificio rehabilitado, que pode servir de pauta para actuacións futuras na recuperación dun amplo patrimonio arquitectónico ameazado”, prosegue o xurado.
Pola súa banda, o centro educativo mosense, obra de Estefanía Grandal Leirós, Juan Ignacio Prieto López e Faustino Patiño Cambeiro, foi premiado na categoría de Equipamentos a raíz da súa “aparente sinxeleza do esquema en planta, baseado nun círculo cortado por unha secante que delimita o patio, enriquécese notablemente no tratamento da sección, as condicións de iluminación e o uso dos materiais, que compoñen un edificio luminoso e optimista”.
O xurado salientou o “acerto no uso da escala, e a disposición do edificio, como un oasis nunha contorna certamente difícil, fan desta obra modesta unha brillante lección de arquitectura”. 
A gala
O acto de entrega de distincións gala converteuse nun evento social, que reuniu a máis de 400 convidados do ámbito da arquitectura galega, ademais de contar coa presenza dun amplo grupo de personalidades dos ámbitos político, empresarial e cultural de Galicia. As distincións foron entregadas por arquitectos gañadores de anteriores edicións e por cada categoría proxectouse un vídeo descritivo coas obras finalistas.
O xurado argumentou que as candidaturas revelan xeralmente unha “elevada calidade” das obras, proxectos e traballos presentados para as diversas áreas temáticas, constatando as razóns polas que a arquitectura contemporánea galega ten gañado recoñecemento e prestixio internacional.
Por outra banda, sinalou que o número de obras presentadas (155 en total), así como a diversidade de programas, ilustran ben a “vitalidade de Galicia no que se refire ás intervencións realizadas”, tanto de carácter público como de iniciativa privada.
“Como sempre, na atribución dun premio sobresae un conxunto de intervencións que acaban naturalmente por constituír a lista de obras seleccionadas, deixando de lado propostas que non por iso deixan de posuír un enorme interese, e que no seu conxunto prestixian os Premios COAG”, apuntou o xurado na acta do fallo do certame.
